Vøllurin við Margáir klárur í dag

Arbeiðið at leggja nýtt graslíki á fótbóltsvøllin við Margáir er komið so væl áleiðis, at vøllurin verður liðugur og klárur at spæla á í dag. Tað skrivar Sunda Kommuna á heimasíðuni. 

Sunda kommunan hevur lagt graslíki á fleiri smærri vøllir í kommununi: Í Hvalvík, á Langasandi, í Tjørnuvík, á Oyri og við Norðskála. Ætlanin er eisini at leggja graslíki við Gjógv. 

Talan er um langtíðarætlan hjá kommununi. Arbeiðið byrjaði í 2007, og málið er, at graslíki skal vera í øllum bygdum í kommununi. Endamálið er at geva børnum og ungum góðar umstøður at íðka ítrótt og vera likamliga virkin, sigur kommunan.