Eingir nýggir sáttmálar hjá tí almenna 1.oktober

Sáttmálasamráðingarnar á almenna arbeiðsmarknaðinum eru so smátt byrjaðar.

Hósdagin var Starvsmannafelagið á fundi við Lønardeildina í Fíggjarmálaráðnum.

Selma Ellingsgaard, forkvinna í Starvsmannafelagnum, sigur, at partarnir avtalaðu, hvussu samráðingarnar skulu skipast.  Fyribils eru fimm dagar settir av til samráðingarnar.

Krøvini latin 

Um hálvan juni læt Starvsmannafelagið Lønardeildini síni krøv. Tá varð eisini avtalað, hvussu samráðast skuldi. Ætlanin var at byrja 26.august.

Men av tí at løgtingsval varð útskrivað, hendi ikki meira, tí hildið varð, at best var at bíða, til valið hevði verið.

Nú er nýggj samgonga skipað, og tí byrja samráðingarnar aftur.

Flestu sáttmálarnir á almenna arbeiðsmarknaðinum, teir eru 25 í tali, fara úr gildi hósdagin, sum er 1. oktober.

Fyri ta tíð verður eingin nýggjur sáttmáli gjørdur millum Starvsmannafelagið og Lønardeildina, tí næsti fundurin verður ikki fyrr enn fríggjadagin 2. oktober, sigur Selma Ellingsgaard.

Á tí fundinum verður Kristina Háfoss, nývald landsstýriskvinna í fíggjarmálum, við.

Ætlanin er at bera skjótt at við at fáa samráðingarnar avgreiddar, tí allir avtalaðu fundardagarnir eru í oktober, sigur Selma Ellingsgaard.