Grønlendska rækjukvotan hækkar næsta ár

Fiskifrøðingarnir mæla til at hækka rækjukvotuna upp í 90.000 tons, sum eru 30.000 tons meir enn tilmælið var í fjør.

Grønlendska vinnan mælir til ikki at hækka kvotuna meir enn 12,5 prosentstig um árið, tí annars er vandi fyri, at MSC-góðkenningin, sum grønlendska rækjuvinnan hevur, verður sett úr gildi.

Grønlendska fiski og veiðumannafelagið, KNAPK, mælir til at hækka kvotuna meira, enn fiskifrøðingarnir mæla til.

Í fíggjarlógini fyri næsta ár hevur grønlendska landsstýrið roknað við inntøku uppá 130 milliónir kr. frá rækjuvinnuni. Tann upphæddin verður hækkað, alt eftir hvussu stór kvotan verður.

Karl-Kristian Kruse sigur seg fegnast um, at tað nú ber til at hækka rækjukvotuna, uttan at MSC-góðkenningin kemur í vanda.