Stórur meiriluti fyri at veita endurgjald í snyrlamálinum

Sambært lógini, sum fólkatingið hevur samtykt, kunnu grønlendskar kvinnur søkja um at fáa 300.000 kr. í endurgjaldi

Grønlendsku fólkatingslimirnir, Qarsoq Høegh-Dam og Naaja H. Nathanielsen, og Ida Auken, heilsumálaráðharri, í fólkatinginum, sum nú endaliga hevur samtykt endurgjald í snyrlamálinum.

Mynd: Ida Marie Odgaard/Ritzau Scanpix

Birita Matras Petersen

27.08.2026 - 11:27

Ein stórur meiriluti í fólkatinginum hevur við triðju og endaligu viðgerð samtykt lóg um endurgjald frá stjórnini til grønlendskar gentur og kvinnur, sum fingu snyril settan upp, ella aðra fyribyrging uttan samtykki ella nøktandi vitan um inntrivið.

Lógin snýr seg um, at grønlendskar kvinnur kunnu søkja um at fáa 300.000 krónur í endurgjaldi.

Í morgin verða tvær frágreiðingar um snyrlamálið almannakunngjørdar.

Fólkadráp

Frágreiðingarnar siga, um danska stjórnin hevur framt fólkadráp í snyrlamálinum.

Eisini siga frágreiðingarnar, um og hvørji brot á mannarættindi eru framd í málinum, skrivar grønlendska kringvarpið, KNR.

Snyrlamálið snýr seg um grønlendskar gentur og kvinnur, sum fingu snyril ella aðra fyribyrging uttan samtykki ella nøktandi vitan um inntrivið millum 1960 til 1992, tá ið Grønland yvirtók heilsuverkið.