Matvørur vorðnar støðugt dýrari í Føroyum

Hagstovan hevur kunngjørt eitt yvirlit um prísgongdina í handlunum seinastu árini. Orsøkin til, at matvørur gerast dýrari og dýrari, eru príshækkingar á heimsmarknaðinum.

Trot á rávørum, sum verða brúktar til matvørur, ger, at rávøran kostar meira. Føroyingar innflyta flestu matvørur, so tí gerast matvørurnar støðugt dýrari her.

Men lønarhækkingar kunnu eisini gera, at tað gerst dýrari at fara til handils. Klæði og skógvar kosta tó á leið tað sama sum fyri tíggju árum síðani, og innbúgv og búnýti, køksamboð, kosta minni nú.

SÍ EISINI Bíligari at liva nú enn fyri einum ári síðani

Orsøkin er, at slíkar vørur verða gjørdar í londum, har sum lønin er lítil, og kappingin er vorðin harðari.

Sambært vísitalinum, sum er sett at vera 100 í 2005, eru matvørur nú stívliga 120, meira enn 20 prosentstig hægri enn fyri tíggju árum síðani.

Búnýti og innbúgv eru fimm prosentstig bíligari nú, og klæði og skógvar eru á sama stigi sum í 2005.