KvF í París: Hetta var eitt øðrvísi álop

129 fólk vóru myrd í einari skipaðari yvirgangsatsókn í franska høvuðsstaðnum, París. IS hevur ikki framt eitt líknandi álop í Evropa fyrr, sigur Uni Holm Johannesen, tíðindamaður hjá Kringvarpinum, sum er staddur í París.

- IS hevur áður tikið ábyrgdina av minni atsóknum í Evropa, har einstakir persónar við óbeinleiðis tilknýti til IS hava lagt álopini tilrættis. 

- Hesaferð tykist atsóknin vera munandi gjøllari fyrireika, nú átta yvirgangsmenn bumbaðu og skutu frá hond á seks ymsum støðum samstundis. IS hevur ikki staðið á odda fyri einum so skipaðum álopi í Evropa fyrr, sigur Uni Holm Johannesen.

Verjuleys vórðu rakt

Atsóknin í París í gjár er tann næsta í franska høvuðsstaðnum í ár.

- Tað er ein greiður munur á hesum báðum álopunum, sum París hevur verið fyri. Í januar troðkaðu yvirgangsmenninir seg inn á redaksjónina hjá Charlie Hebdo fyri at hótta talufrælsið.

Í januar var talan um eitt beinleiðis symbolálop. Hesaferð vóru tað ósekir og verjuleysir borgarar, sum vóru myrdir, sigur føroyski tíðindamaðurin í París.

Birta undir fremmandahatur

Frakland hevur verið við í stríðnum móti religiøsari totalterismu. Franska stjórnin hevur seinastu mánaðirnar bumba  Islamiska Statin í bæði Irak og Sýria. Nú fór IS aftur í mótálop.

- Ætlanin við hesum álopunum er millum annað at ræða fraklendingar fyri at birta undir fremmandahaturin í landinum. Fremmandahatur og mistrúgv kunnu elva til, at muslimar kenna seg útihýstar í samfelagnum og fara at styðja Islamiska Statin.

Tað er av somu orsøk ein ynskistøða hjá IS, at Marine Le Pen og Front Nationale hava stóra undirtøku í Fraklandi. Tað syndrar og spjaðir tey, sum búgva í Fraklandi, og tað er bara ein fyrimunur fyri IS, sigur Uni Holm Johannesen, tíðindamaður.

Meira verður at frætta í útvarpstíðindunum í morgin.