Kommunuskatturin í Havn lækkar

Barnafrádrátturin verður tann sami, 8.000 kr. Inntøkurnar hjá høvuðsstaðarkommununi eru mettar at verða 848 mió. kr. næsta ár, knappliga fimm prosent meira enn í ár.

Raksturin fer at kosta 20 milliónir krónur meira enn í ár. Útreiðslurnar eru mettar av vaksa minni enn inntøkurnar. Tær verða 677 mió. kr., hálvt triðja prosent meira enn í ár. 330,5 mió. kr. eru settar av til íløgur.

Flogvøllur á Glyvursnesi er ikki gloymdur. Í tíðindaskrivi frá teimum 11 býráðslimunum, sum samtyktu fíggjarætlanina, stendur, at komandi virksemið á Glyvursnesi, har sum grót skal takast til havnarútbyggingina, fer at geva nógv arbeiði.

Samstundis leggur arbeiðið lunnar undir vegargerð, møguligar útstykkingar og framtíðar flogvøll. 200 mió. kr. eru settar av til havnarútbyggingina næsta ár. Jákup Dam í Tjóðveldi atkvøddi fyri fíggjarætlanini, hinir bæði í Tjóðveldi atkvøddu ikki.