Bíligari at víðka tunlarnar

Tveir nýggir tunlar verða mettir at kosta 360 milliónir kr. Kostnaðarmetingin er dagførd við royndunum frá Viðareiðistunlinum.

Tað upplýsir Henrik Old, landsstýrismaður í samferðslumálum, í svari til Elsebeth Mercedis Gunnleygsdóttir í Fólkaflokkinum, sum spurdi um málið.

SÍ EISINI Vil hava tunlarnar Norður um Fjall framskundaðar

Ein norsk rágevarafyritøka hevur gjørt skitsuprojekt og meting fyri Landsverk, hvat tað kostar at víðka verandi tunlar.

Kostnaðurin er millum annað tengdur at, hvussu nógv tað ber til at steingja tunlarnar, meðan arbeitt verður.

Arbeiðið mett at kosta 315 milliónir

Slepst gjøgnum tunlarnar tríggjar ferðir um dagin - morgun, seinnapart og um kvøldið - fer tað at kosta 315 milliónir krónur at víðka teir.

Verða tunlarnir stongdir heilt fyri ferðslu, er kostnaðarmetingin 290 milliónir kr., men tá má roknast við, at ferja má setast í sigling, og tað er ikki tikið við í kostnaðarmetingina, sigur Henrik Old.

Elsebeth Mercedis Gunnleygsdóttir spurdi eisini um trygdarviðurskiftini í tunlunum Norður um Fjall. Henrik Old sigur, at ein tilbúgvingarætlan fyri tunlarnar varð gjørd í 2011 saman við sløkkiliðunum, sjúkrahúsinum og løgregluni.

Ferðslan skal stýrast við ferðsluljósum

Til tess at bøta um møguleikarnar at samskifta millum partarnar í tilbúgvingini, verða forstyrkjarar settir upp í báðum tunlunum í ár.

Rýmingarljós og eldsløkkjarar eru settir upp í Hvannasundstunlinum, og sama trygdarútgerð verður sett upp í Árnfjarðartunlinum. Tað verður liðugt í hesum árinum.

Trupulleikar eru javnan við ferðsluni í tunlunum, tí stór akfør kunnu ikki møtast. Landsverk arbeiðir við at stýra ferðsluna við ferðsluljósum.

Skelti heldur enn automatiskar bummar

Stór akfør skulu steðga fyri reyðum ljósi, um onnur stór mótkoyrandi akfør eru í tunlinum. Arbeitt verður við at fáa skipanina setta upp í ár ella fyrst í nýggja árinum.

Ætlanin er ikki at seta automatiskar bummar upp við tunnilin, men at nýta skeltini, sum verða nýtt til ferðslustýringina at steingja tunnilin.

Skeltini verða fjarstýrd, so tunnilin verður stongdur so skjótt sum til ber, tá boðað er frá óhappi, sigur Henrik Old landsstýrismaður, í svarinum til Elsebeth Mercedis Gunnleygsdóttir.