Einki úrslit um makrel

Sambært norska FiskeribladetFiskaren spurdist einki burturúr. Hetta ger eisini, sambært norska samráðingarleiðaranum, Ann Kristin Westberg, at tað verður torført at fáa meiriluta í NEAFC um kvotuna í altjóða sjógvi.

Nú eingin semja er millum ES, Noreg og Føroyar øðrumegin og Ísland, Russland og Grønland hinu megin borðið, er vandi fyri, at eisini næsta ár verður ov nógvur makrelur fiskaður.

Tí, fiska Ísland og Grønland á leið tað sama næsta ár sum í ár, fer fiskiskapurin langt upp um eina millión tons, sum er nógv meira enn fiskifrøðingar mæla til.

Royna nú at semjast um svartkjaft og norðhavssild

ES, Noreg og Føroyar hava sett heildarkvotuna at vera 895.000 tons í 2016, og tey hava sett av 15,6 prosent av heildarkvotuni til onnur lond at fiska.

Makrelfiskiskapurin hjá Grønlandi er royndarfiskiskapur. Grønland hevur ikki biðið um at gerast strandarland.

Nú royna strandarlondini at finna semju um, hvussu tey skulu býta svartkjaft og norðhavssild. Tær samráðingarnar eru eisini í London.