Meting av umhvørvisávirkan góðkend

Umhvørvisstovan hevur lagt dent á ávirkan á náttúru og umhvørvi, men atlit at fornminnum, ferðslu og útsjónd hava ikki verið partur av viðgerðini. 

Tórshavnar havn biðið donsku ráðgevarafyritøkuna, Rambøll, gera meting av, hvørja ávirkan ætlaða havnarútbyggingin fer at hava á náttúru og umhvørvið.

SÍ EISINI Bjóða nú arbeiðið út til undangóðkenning

Rambøll sigur, at økta virksemið á havnarlagnum og økta ferðslan á landi fer at føra til nakað av øktum óljóði. Mett verður tó ikki, at óljóðið fer upp um vegleiðandi markvirðið fyri óljóð.

Rambøll sigur eisini, at fleiri skip og økt ferðsla fara at hava við sær ávísan vøkstur í luftdálkingini, men hetta verður ikki mett at ávirka luftgóðskuna nærhendis havnarlagnum munandi.

Metingin kann kærast til 30. desember

Plantu- og djóralívið á staðnum verður eisini ávirkað av ætlanini, men hon er sera avmarkað. Umhvørvisstovan metir, at nakrar av verandi spillivatnsútleiðingunum skulu leggjast longur út, fyri at kunna verða góðkendar aftan á ætlaðu havnarútbyggingina.

Umhvørvisstovan vísir á, at hon í viðgerðini einans hevur lagt dent á ávirkan á náttúru og umhvørvi, meðan atlit til fornminni, ferðslu, útsjónd og annað hava ikki verið partur av viðgerðini.

Góðkenningin kann kærast til landsstýriskvinnuna í umhvørvismálum. Kærurætt hava tey, sum avgerðin hevur ein serstakan, beinleiðis og persónliga týdning fyri. Evsta mark at kæra er 30. desember.