Søluprísurin ikki almennur fyribils

Tórshavnar kommuna noktar at geva alment innlit í søluprísin fyri BankNordik-bygningin við SMS. Ikki fyrr enn avtalan er endaliga góðkend í Danmark, kunnu fjølmiðlar og onnur fáa innlit í prísin.

Kommunan hevur keypt bygningin frá Bank Nordik fyri 40 mió krónur. Í eina tíð hevur kommunan samráðst við Bygningsstyrelsen í Danmark, sum ætlar at keypa bygningin og leiga hann út til politistøð.

SÍ EISINI Bygningurin kann ikki keypast enn til løgregluna

Partarnir gjørdu fyrst í januar eina avtalu um, at Bygningsstyrelsen keypir bygningin, treytað av at játtandi myndugleikin í Danmark góðkennir keypið.

Umframt BankNordik-bygningin ætlar Bygningsstyrelsen eisini at keypa grannaognina, sum er eitt jarðarstykki omanfyri bygningin.

Bygningsstyrelsen vil heldur ikki upplýsa prísin

Grundgevingin hjá Tórshavnar Kommunu fyri at fólk ikki skulu hava søluprísin at vita nú, er grein 13 stykki 5 í lógini um alment innlit.

Har stendur, at rætturin til skjalainnlit kann avmarkast í tann mun tað er neyðugt til verju av munandi umhugsni viðvíkjandi fíggjarligu áhugamálunum hjá tí almenna.

Haraftrat vísir kommunan á, at talan er um treytaða avtalu. Tí metir hon, at prísurin kann dyljast fyribils. Bygningsstyrelsen vil heldur ikki upplýsa, hvussu nógv BankNordik-bygningurin kostar.