Seinasta orðið um heimið ikki sagt enn

Stríðið um Eldrasambýlið á Skála, ið ætlanin er at steingja, er als ikki liðugt enn. Tveir býráðslimir leggja nú fram uppskot um at varðveita heimið

Tveir býráðslimir í Runavíkar kommunu leggja nú fram uppskot um at varðveita Eldrasambýlið á Skála, ið ætlanin annars var skuldi steingja

Sigrún H. Brend

Bjarni Mohr

28.01.2016 - 09:19

Klokkan 17 í dag verður býráðsfundur í Runavíkar kommunu har millum annað uppskot um at varðveita Eldrasambýlið á Skála kemur til viðgerðar.

Tað eru Karl Rasmussen og Bárður Kass Nielsen, sum umboða Skála í Runavíkar býráð, sum hava lagt uppskotið fram, skrivar nordlysid.fo

SÍ EISINI Vilja varðveita Eldrasambýlið á Skála

Í 2015 tók stýrið í Skálafjarðarstamstarvinum avgerð um at umskipa eldraøkið við Skálafjørðin soleiðis, at Sambýlið á Skála og Vistarheimið í Runavík verða niðurløgd sum virkandi eindir.

- Tað er óskiljandi at Runavíkar kommuna umvegis sína umboðan í stýrinum í Skálafjarðarsamstarvinum hevur latið seg trýsta til at leggja tvær virkandi funktiónir niður í egnari kommunu, siga Karl Rasmussen og Bárður Kass Nielsen.

Teir báðir vísa á, at Sambýlið á Skála og Vistarheimið í Runavík verða stongd, meðan virksemið á Toftum heldur fram og nýtt sambýli verður latið upp á Strondum, skrivar Norðlýsið.