Northern Ocean er ársins skip í FAS

Kemikaliutangaskipið Northern Ocean, sum er skrásett í Føroysku altjóða skipaskránni FAS og hevur heimstað í Nólsoy, er ársins skip í Føroyum í 2015. 

Heiðurin fekk skipið frá Sjóvinnustýrinum.

Nummar tvey gjørdist Sjóborg og nummar trý varð Sæborg, bæði skip hjá Skansanum Offshore. 

Sjóvinnustýrið heiðrar hvørt ár skip undir føroyskum flaggi, sum hava serliga góð úrslit í skiparakstri og trygd. 

Munurin millum skipini á fyrsta, øðrum og triðja plássi er sera lítil, sigur Sjóvinnustýrið. Men Northern Ocean vann, tí tað fekk fægstar viðmerkingar, tá klassafelagið hevði eftirlit umborð. 

Leggja dent á væl rikin arbeiðspláss

Sjóvinnustýrið leggur stóran dent á, at skip í FAS eru væl rikin og trygg arbeiðspláss. Tí hevur Sjóvinnustýrið seinastu árini samskift við skipini um góðan rakstur. 

Góð rakstrarúrslit eru við til at vaksa um virðingina fyri føroyska flagginum.

Tað hevur eisini givið úrslit. Flaggið hevur seinastu árini gjørt eitt stórt lop upp eftir á hvíta listanum hjá Paris MoU.

ParisMoU er millumlandafelagsskapur, ið kannar skip, sum koma í havnir í Evropa og londum við Norðuratlantshav. 

2015 er triðja árið, Sjóvinnustýrið kýsur ársins skip. Í 2013 vann Nordjarl, og í 2014 var Norrøna ársins skip.