Vilja hava stýrisskipanina broytta

Miðflokkurin hevur loftað sjónarmiðunum hjá Torkili V. Rasmussen, løgfrøðingi, og Bergi Berg, stjórnmálafrøðingi, um tingsessirnar hjá teimum, sum fara í landsstýrið.

Tingmenninir hjá Miðflokkinum løgdu í gjár fram uppskot um at broyta stýrisskipanina, so løgmaður og landsstýrisfólk, sum eru fólkavald, eisini kunnu hava sæti á Løgtingi.

Sambært broytingini skulu tey, sum fara í landsstýrið, sjálv avgera, um tey siga tingsessin frá sær.

Seinasta løgtingsval eitt gott dømi

Torkil V. Rasmussen og Bergur Berg siga, at tey, sum fáa flestar atkvøður í flokkunum, sum fara í samgongu, eru tey, sum fara í landsstýrið og noyðast tí at siga fólkavalda sessin í Løgtinginum frá sær.

Tey, sum fólkið dámar best, eru tí ikki í fólkavalda tinginum. Løgtingsvalið í fjør er gott dømi um hetta. Tey átta í landsstýrinum fingu 21,2 prosent av atkvøðunum.

Tey átta varafólkini, sum komu í tingið fyri tey, sum fóru í landsstýrið, fingu bara seks prosent av atkvøðunum. Øll átta varafólkini fingu tilsamans 565 færri atkvøður enn Aksel V. Johannesen, løgmaður, fekk einsamallur.