Arbeiðið gongur framá

Ætlanin at byggja nýggjan húsarhaldsskúla í Klaksvík er nú komin eitt fet nærri veruleikanum. Nýggi skúlin er mettur at kosta 30 milliónir krónur

Arbeiðið at byggja nýggjan húsarhaldsskúls í miðbýnum Klaksvík er komið eitt fet nærri eftir, at Klaksvíkar Býráð einmælt samtykti hóskvøldið at játta sín part av byggikostnaðinum

Finnur Koba

Bjarni Mohr

20.03.2016 - 19:31

Arbeiðið at byggja nýggjan húsarhaldsskúla í miðbýnum Klaksvík er komið eitt fet nærri eftir at Klaksvíkar Býráð hóskvøldið einmælt samtykti at játta sín part av byggikostnaðinum.

Fríggjadagin handaði Jógvan Skorheim, borgarstjóri, Jóhonnu á Tjaldrafløtti, skúlastjóra í Húsarhaldsskúla Føroya tilsøgnina frá Klaksvíkar býráð, skrivar heimasíðan hjá kommununi.

Skúlin mettur at kosta 30 milliónir

Tað var húsarhaldsskúlin sjálvur, sum sendi kommununi umsókn um stuðul. Parturin hjá kommununi er 18,5 milliónir krónur. Hendan upphæddin kann minka, eydnast tað eisini at fáa aðra fígging.

Peningurin fellur til gjaldingar, tá verkætlanin er liðug. Og hetta verður í fyrsta lagi næsta ár, stendur í skránni til býráðsfundin.

Ein byggibólkur, mannaður við arkitekti og umboðum fyri Mentamálaráðið, Húsarhaldsskúla Føroya og Klaksvíkar Kommunu, hevur gjørt ein byggiskrá, og skúlin er mettur at kosta 30 milliónir krónur.