- Tíðindi, mentan og ítróttur
Játtanarkarmarnir viðgjørdir í dag
![](https://kvf.fo/sites/default/files/styles/grein-ovasta-mynd/public/logtingid_6.jpg?itok=59WuIMba)
Tað er ikki óhugsandi, at kjakið millum annað fer at snúgva seg um játtanina til mentan og list komandi árini, nú játtanarkarmarnir verða viðgjørdir í tinginum.
Mánakvøldið sendi landsstýriskvinnan við mentamálum, Rigmor Dam, ikki bara eitt, men tvey tíðindaskriv, har hon grundgevur fyri størri játtanum til sítt øki.
Vil hava meira pening til mentan
Millum annað vil Rigmor Dam at játtanin til mentanarstuðul hækkar upp í 10 milliónir næstu trý árini. Málið er, at fleiri listafólk skulu fáa løn úr Mentanargrunninum at arbeiða við.
Hóast talan er um smáar upphæddir sammett við so nógv annað á fíggjarlógini, so hevur júst Mentanargrunnurin fyrr elvt til ógvusliga øsing, tá upphæddin í grunninum er lækkað ella hækkað.
Tað var millum annað lækking av stuðlinum, sum førdi við sær umfatandi listaboykottið, sum vardi í fleiri ár.
SÍ EISINI Tak niður: Uppskot til játtanarkarmar 2017
Meginparturin av íløgunum hjá landinum næsta ár fara til mentan og heilsu, ávikavist at gera miðnámsdepilin Glasir lidnan og at byggja nýggjan psykiatriskan depil.
Hevur tú ikki stundir at fylgja politiska kjakinum í tinginum í dag, kanst tú hyggja í sjónvarpið í kvøld. Har verður kjak um játtanarkarmarnar við øllum floksformonnunum. Kjakið byrjar eftir Dag & Viku.