Vita hvørjir gerningsmenninir eru

Eftirlýsingin hjá politinum í gjár gav úrslit.

Politiið veit nú, hvørjir teir tríggir menninir eru, sum sunnumorgunin skulu hava lagt á ein 48 ára gamlan mann við Klubbagarðinum í Havn.

Fólk vendu sær til politiið við upplýsingum, og í gjárkvøldið kunngjørdi politiið í tíðindaskrivi, at tað hevði funnið gerningsmannin, sum partvíst hevur játtað seg sekan.

Sambært politinum breyt 48 ára gamli maðurin annað beinið millum annað.

Politiið sigur við Útvarpið í morgun, at tey vita eisini, hvørjir hinir báðir eftirlýstu menninir eru. 

Hóast teir ikki eru undir illgruna fyri beinleiðis at hava verið við í harðskapinum, kunnu teir verða ákærdir fyri at vera samsekir.

Ikki úr Havn

Politiið hevur ikki áður havt nakað við hesar menninar at gera, og tí var ikki so lætt at finna teir í fyrsta umfari. Menninir eru ikki úr Havn.

Kanningarnar í málinum halda fram í dag. Politiið vil framvegis frætta frá fólki, sum halda seg vita okkurt um hetta mál, sum byrjaði klokkan tíggju minuttir í fýra sunnumorgunin.

48 ára gamli maðurin hevur sagt við politiið, at hann stóð og bíðaði eftir einum hýruvogni við Klubbagarðin, tá hann varð álopin og sligin niður. 

Sambært tíðindaskrivinum frá politinum í gjárkvøldið fóru menninir til hendurs.