Góður ársfjórðingur hjá Bakkafrosti

Prísurin á laksi vaks nógv, tí útboðið er minkað. Alideildin og Havsbrún, sum ger fiskamjøl, lýsi og fóður, høvdu eitt gott rakstrarúrslit fyrsta ársfjórðing. 

Men hjá deildini, sum ger lidnar vørur, gongst ikki so væl. Hon gav 25 milliónir í halli fyrstu tríggjar mánaðirnar í ár.  

Sum skilst gevur tað meira at selja laksin heilan enn at skera hann í porsjónir og pakka hann. Regin Jacobsen, stjóri í Bakkafrosti, sigur, at tá laksaprísurin hækkar nógv í so stuttum tíðarbili, verða umstøðurnar hjá liðugt­vøruframleiðsluni truplar. 

66 miljónir betri

Úrslitið í fyrsta ársfjórðingi í ár er 19 milliónir krónur betri enn í fjør. Men alideildin hevði nógv betri úrslit í ár. Tað er 261 milliónir, 66 milliónir betri enn í fjør.   

Bakkafrost gjørdi íløgur fyri 120 milliónir krónur í fyrsta ársfjórðingi í 2016. 

Nettoskuldin hjá Bakkafrosti var 218 milliónir krónur 31.mars. Hon var 392 milliónir 31.mars í fjør.

Góð útlit

Eftirspurningurin eftir laksi heldur fram at vaksa í ár, og útboðið minkar seks prosent. Bakkafrost væntar at taka 48.000 tons av laksi í kruvdari vekt í ár.
Higartil í ár hevur Bakkafrost selt meira laks heilan enn at brúka hann til lidnar vørur, tí prísurin fyri heilan laks er so góður. 

Alideildin hjá Bakkafrosti hevði nógv betri úrslit í fyrsta ársfjórðingi í ár enn í fjør, 261 milliónir í ár, 66 milliónir betri enn í fjør.   Men langtíðarmálið hjá Bakkafrosti er selja 40-50 prosent av laksinum sum lidnar vørur fyri fastan prís.

Bakkafrost hevur gjørt avtalur um 63 prosent av framleiðsluorkuni hjá liðugvørudeildini tað, sum eftir er av 2016.