Fara undir kirkjugarð í Hoyvík 1. juni

Tórshavnar býráð samtykti einmælt í gjárkvøldið at keypa lendi í Hoyvíkshaganum til kirkjugarð.

Lendið verður keypt frá Búnaðarstovuni, og tað kostar 2,4 mió. kr. Fyrsta byggistig verður boðið út undirhonds. 

380 gravir

Partafelagið Hansen og Jakobsen og smápartafelagið Hellisdal sleppa at bjóða. Arbeiðið skal byrja 1.juni.

Í fyrsta byggistigi verður pláss fyri 380 gravum.

Harafturat verður pláss fyri barnagrøvum, urnugrøvum og felagsøki við plássi til starvsfólk. 

Í fyrsta byggistigi eru eisini arbeiðsvegur frá Klingruni og útgrevstur til bilpláss. 

Bað um kapping

Kommunan bað tvær ráðgevarafyritøkur kapppast um, hvussu kirkjugarðurin í Hoyvík skal skipast.

Men sambært uppskotunum, sum býráðið fekk, fór arbeiðið at kosta ov nógv. 

Býráðið samtykti tí, at kommunan sjálv ger verkætlanina, og at ráðgevarafyritøkurnar fáa 25.000 kr. hvør fyri ómakin.