Tilmælið um endurvenjing á gáttini

Ógreitt er, hvør skal bjóða fólki endurvenjing, landið ella kommnurnar, eftir at heimarøkt og eldraøkið varð latið kommununum at umsita. Síðani hevur ivi verið um markamótið millum land og kommunur.

Tí varð ein arbeiðsbólkur settur at gera tilmæli um eina samanhangandi tænastu og eitt yvirlit, sum ger, at eingin longur ivast í, hvørja endurvenjing ávikavist sjúkrahúsini, Almannaverkið og kommunurnar skulu veita.

So leingi bíðað verður eftir tilmælinum hjá arbeiðsbólkinum, og til politisk støða er tikin til tilmælið, eru landsstýrið og Kommunufelagið samd um, at kommunurnar bjóða fólkapensjónistum endurvenjing.

Sjúkrahúsverkið gevur sjúklingum endurvenjing, og Almannaverkið hevur fólk upp í 66 ár, sum hava brúk fyri endurvenjing eftir sjúku ella skaða.