Jákup: - Hann sparkar meg inn á skinnabeinið við nógvari megi

 - Avrikið var heilt fantastiskt, helt Jákup Biskopstø.

Miðvallarin frøddist um, at hann aftur var á vøllinum fyri landsliðið, eftir at skaðar hildu honum uttanfyri í teimum fyrstu fýra Nations League-dystunum, og hann var væl nøgdur við javnleikin í Slovakia.

 - Vit fara herfrá við einum stigi. Vit eru ósigraðir enn, og vit kenna tað so, at vit skuldu havt vunnið hendan dystin. Eg haldi, at mann er komin langt sum landslið, og tað er stuttligt at vera partur av, segði KÍ-miðvallarin.

Tað var Jákup Biskopstø, sum vann brotssparkið, sum gav Føroyum kjansin at javna eftir laka byrjan í Kosice.

 - Eg haldi, videoupptøkurnar vísa, at eg fekk øgiliga ilt, segði miðvallarin um brotssparkið, sum viðmerkjararnir hjá KvF hildu vera í bíligara endanum.

 - Eg haldi, at hatta er brotsspark. Eg fari inn, og hann sparkar meg inn á skinnabeinið við nógvari megi, og eg fái ilt, men hevur tú kjansin at fáa dómaran at hugsa seg um eina ferð eyka, so gert tú tað, segði Jákup Biskopstø.

Viljormur Davidsen ivaðist ikki og javnaði við sínum áttanda landsliðsmálið, og eftir steðgin legði Áki Samuelsen Føroyar framum. Slovakar javnaðu, og hóast føroyingarnir raktu tvørtræð og stong báðu megin útjavnandi málið, kom einki mál afturat.

 - Nú er tað upp til Føroya fólk at fylla Tórwsvøll mánadagin klokkan 15, og so ætla vit okkum at vinna hasa finaluna á heimavølli, segði Jákup Biskopstø.

Kringvarpið vísir dystin og byrjar at senda klokkan 14.00.