Einki sakarmál um Anitu

Føroya rættur hevur víst sakarmálinum um garnaskipið Anitu frá sær, tí einki umboð fyri reiðaríið møtti á fyrireikandi rættarfundinum, sum var hósdagin.

Nú er næstan eitt ár síðani, rætturin bað felagið koma við einum fyribils endurgjaldskravi, men einki krav er komið. Og advokaturin hjá partafelagnum, Seta, gav skarvin yvir í mai.

Tá einki umboð møtti á rættarfundinum hósdagin, gjørdi rætturin av at vísa málinum frá sær. Tað var Kaj Leo Holm Johannesen, táverandi løgmaður, sum tók øll fiskirættindi frá skipinum til 31. august í ár.

Tá boðaði reiðaríið frá endurgjaldskravi, men tað verður nú av ongum. Málið um Anitu verður umrøtt í landsstýrisumsitingini, men hvat úrslitið av tí verður, er ikki greitt enn.