Funnið olju í Norðsjónum

Faroe Petroleum hevur funnið olju og gass í norska partinum av Norðsjónum. Felagið boðar frá, at olja og gass eru funnin í síðubrunni hjá Brassefundinum.

Faroe Petroelum er fyristøðufelag og eigur helvtina av loyvinum. Norska oljumálaráðið fegnast um fundin, tí hann er beint sunnan fyri Brageleiðina, har ein oljupallur er.

Útlit eru nú fyri, at hesin pallurin kann halda fram leingi afturat, nú olja er funnin so stutt frá honum. Faroe Petroleum eigur 14,3 prosent í loyvinum á Brageleiðini.

Fundurin hjá Faroe Petroleum er hin størsti higartil á norskum øki í ár. Hann er mettur at vera millum 43 og 80 milliónir tunnur.