Fáa størri forsorgarveiting

Fólk yngri enn 25 ár, sum fáa forsorgarveiting og búgva heima hjá foreldrum, fáa 1.535 krónur meira um mánaðin, tá løgtingið hevur samtykt lógarbroytingina hjá landsstýriskvinnuni í almannamálum.

Eyðgunn Samuelsen sigur, at hon fer at skjóta upp at hækka veitingina, so hon fer upp í 3.130 kr. um mánaðin, tá skattur og onnur gjøld eru drigin frá.

Veitingin er ætlað ungum fólkum, sum fáa forsorgarhjálp av heilsuávum, ella tí tey eru arbeiðsleys.

Hækkingin fer at kosta landskassanum 450.000 kr. um árið.

Forsorgarlógin skal eisini broytast soleiðis, at foreldur, sum eiga barn á stovni, hava rætt til endurgjald fyri mista inntøku í sambandi við, at tey fara við barninum til viðgerð á sjúkrahúsi.