Føroysku peningastovnarnir eisini umfataðir

Føroya váðaráð skal eisini geva peningastovnunum í Føroyum ávaringar og tilmæli, hóast bankar og sparikassar í Føroyum eru danskt málsøki og tí eru undir danska váðaráðnum, Det Systemiske Risikoråd.

Tað sigur Kristina Háfoss, landsstýriskvinna, sum hevur svarað spurningum frá Bill Justinussen, løgtingsmanni í Miðflokkinum.

Føroya váðaráð fer at lata Skráseting Føroya, Tryggingareftirlitinum ella landsstýrinum tilmæli og ávaringar. Landsstýrið kann til dømis brúka tilmæli frá Váðaráðnum at gera uppskot um lógir ella lógarbroytingar.

SÍ EISINI Danir góðtaka ikki føroyskt váðaráð

Landsstýrið ætlar eisini at fáa samstarv við danska Fíggjareftirlitið, so Váðaráðið haðani kann fáa at vita um møguligar váðar í føroyska bankakervinum, váðar, sum kunnu raka alt samfelagið.

Bill Justinussen spurdi millum annað, um føroyskir myndugleikar kunnu áleggja føroyskum peningastovnum størri kapitalkrøv. Kristina Háfoss svarar, at danskir myndugleikar geva peningastovnunum í Føroyum krøv um kapital.

Føroya váðaráð skal tryggja, at føroyskir myndugleikar í góðari tíð fáa ávaringar um fíggjarligar váðar í samfelagnum, og tilmæli um átøk, sum kunnu fyribyrgja, at fíggjarligir váðar gerast til framtíðar fíggjarkreppur, sigur Kristina Háfoss, landsstýriskvinna.