Viðgerðin heldur fram

Nevndin hevur sent boð eftir Kappingareftirlitinum og Magna Laksafoss, sum hevur orkufelagið Vitorka. Bæði Umhvørvisstovan og Landsverk mæla til at brúka jarðhita.

Hann kostar 13,4 milliónir krónur í íløgu. Og teir pengarnar hevur Rigmor Dam biðið Løgtingið um. Men longu í desember í fjør kundi Fjarhitafelagið latið Glasi grønan fjarhita.

Tað stendur í tilboði, sum felagið gav Landsverki á vári 2013. Sambært hesum tilboðnum og uppskoti um sáttmála um fjarhita skuldi íbindingin, altso íløgan, einki kosta.

SÍ EISINI Eina viku at finna orkuloysn

Hetta visti Mentamálaráðið longu á vári 2013 sambært innliti, sum Kringvarpið hevur fingið. Men tilboðið og uppskotið um sáttmála frá Fjarhitafelagnum vóru ikki við, tá lógaruppskotið um at hækka byggikostnaðin 13,4 mió.kr. kom í tingið.

Hesar upplýsingar fingu løgtingsfólk frá Fjarhitafelagnum sjálvum. Í síðstu viku sendi landsstýriskvinnan so boð eftir teimum, sum bjóða seg fram at hita Glasir.

Rigmor Dam ætlar sær, sum skilst, ikki at taka aftur lógaruppskotið um 13,4 milliónir krónur til jarðhita, um hon ikki hevur boð um nakra semja í dag ella í morgin. Løgtingsfundur verður í morgin.