Veljarakanning: Samgongan varðveitir meirilutan

Kanningin hjá Portal.fo vísir, at Javnaðarflokkurin, Tjóðveldi og Framsókn varðveita sínar til samans 17 tingsessir.

Javnaðarflokkurin hevur størstu afturgongdini í kanningini, 0,9 prosentstig, og fer niður í 24,2 prosent, men varðveitir sínar átta tingsessir.

Tjóðveldi hevur lítla afturgongd, 0,2 prosentstig, og fær til samans 20,5 prosent. Tjóðveldi varðveitir sínar sjey tingsessir.

Framgongdin hjá Framsókn er 0,3 prosentstig og fer upp í 7,2 prosent. Framsókn varðveitir eisini báðar tingsessirnar.

Sambandsflokkurin hevur størstu framgongdina

Nýtt Sjálvstýri stendur til at missa annan tingsessin, meðan Sambandsflokkurin fær ein afturat. Sambandsflokkurin hevur eisini størstu framgongdina, 0,9 prosentstig.

Var val nú, hevði Sambandsflokkurin fingið 19,7 prosent av atkvøðunum sambært kanningini. Tað gevur flokkinum ein tingsess afturat, Sambandsflokkurin hevði fingið sjey tingsessir í alt.

Fólkaflokkurin stendur at kalla í stað. Afturgongdin er 0,1 prosentstig. Flokkurin hevði fingið 18,8 prosent, var val nú. Fólkaflokkurin varðveitir sínar seks tingsessir.

Miðflokkurin stendur eisini í stað. Afturgongdin er 0,1 prosent, 5,4 prosent í alt. Nýtt Sjálvstýri hevur framgongd, 0,2 prosentstig, men missir ein tingsess.

Flokkurin hevði fingið 4,3 prosent. 527 fólk vóru spurd í kanningini, sum Gallup hevur gjørt fyri portal.fo.