Bilvrak fáa bilførarar at halda hámarksferðina

Átakið hjá Ferðslutrygd við bilvrakum fram við landsvegunum hevur havt við sær, at nógv fleiri siga halda hámarksferðina. 

Tað vísir ein kanning, sum Gallup hevur gjørt fyri Ferðslutrygd.

Kanningin vísir, at síðani 2012 hava ongantíð so mong sagt seg halda hámarksferðina, ella 46 prosent.

Átakið ávirkaði mest tey, sum fyrr hava sagt seg koyra 90 kilometrar um tíman. 

11 prosent av teimum, sum siga hava koyrt 100 kilometrar um tíman, ella skjótari, eru eisini ávirkað av átakinum við bilvrakunum.

32 prosent í fjør

Í apríl í fjør, t.e. áðrenn tiltakið varð sett í verk, søgdu bara 32 prosent, at tey halda hámarksferðina. Í august svaraðu 46 prosent, at tey halda hámarksferðina.

Aldursbýtið í nýggju kanningini vísir, at tað eru serliga 18-24 ára gomul, sum siga koyra skjótari enn loyvt. 

Kanningin vísir, at tess eldri, fólk gerast, tess betur halda tey hámarksferðina. 

Ráðið fyri Ferðslutrygd og Tryggingarfelagið Føroyar skipaðu fyri átakinum við bilvrakunum. Tað tók støði í filminum "Hin dagin, eg hevði skund."