Lønirnar minka aftur

Eftir eitt upplop, sum Hagstovan nevnir tað, eru lønirnar í fiskivinnuni aftur farnar at minka. Upplopið í bólkinum fiski- og alivinna byrjaði á heysti í fjør og vardi til í vár.

Seinastu sjey mánaðirnar hevur fiski- og alivinnan havt afturgongd. Líkt er til, at fiskivinnan fer at leggja seg á sama stað sum fyri upplopið, sigur Hagstovan.

Meira útgoldið enn í 2015

Stóra framgongdin í fiskivinnuni í vár gjørdi, at fiski- og alivinnan rindaðu góð tíggju prosent meira í lønum og hýrum.

Men nú er hendan framgongdin í fiski- og alivinnuni minkað niður í knappliga níggju prosent.

Higartil í ár eru goldnar 1,25 milliardir krónur í lønum og hýrum í fiskivinnuni og alivinnuni, 102 milliónir meira enn í fjør vísa tøl hjá Hagstovuni.