Kunnu ikki útbúgva læknar

Tað ber ikki til at fara undir læknalestur í Føroyum, soleiðis sum støðan er nú, verri enn so. Tað heldur Læknafelagið.

Læknalestur í Føroyum krevur eina rúgvu av serlæknum, sum verða knýttir at Fróðskaparsetrinum. Og teir serlæknarnir eru ikki í Føroyum nú.

Mæla til føroyska útbúgving

Verkætlanarbólkurin, ið skrivaði álit um føroyska heilsuverkið, mælir til, at ein læknaútbúgving verður sett á stovn á Fróðskaparsetri Føroya.

Mælt verður til at hava 10 lesandi hvørt ár á bachelorstigi, og tað skal gerast í samstarvi við fróðskaparsetur uttanlands.

Læknalestur í Føroyum hevði útvegað og varðveitt fleiri heilsustarvsfólk, heldur verkætlanarbólkurin. Men í Føroyum er trot á læknum.

Játtanin má hækkast

Fyrsta stig er at hækka játtanina til heilsuverkið munandi, so læknar fáa eina rímiliga arbeiðsviku.

Ikki fyrr enn tá verður tíð til akademiskt virksemi eisini, bæði undirvísing av studentum og til gransking, heldur Læknafelagið.

Men alt hetta kostar nógvar pengar, minnir Læknafelagið á.