Móttøkustøðir gerast kring landið

Skipanin skal krevja inn og gjalda pantið og standa fyri, at tilfarið verður endurvunnið. Rúsdrekkasølan skjýtur upp, at innflytarar, framleiðarar, IRF og Kommunala brennistøðin á Hjalla standa fyri skipanini.

Galdandi pantskipan er ikki nóg góð, heldur Rúsdrekkasølan. Ójavnt er, hvar fløskur og íløt kunnu latast inn, og hetta er ein bági bæði fyri viðskiftafólk og handlar. 

Haraftrat eru tómar fløskur og íløt at meta sum rusk, ið kemur í bland við matvørur, tá tey koma innaftur. Varð ein felags pantskipan gjørd, høvdu fólk eitt stað at fara við øllum fløskum og íløtum. 

SÍ EISINI 20 milliónir ikki goldnar aftur

Av tí at IRF og Kommunala brennistøðin á Hjalla hava førleikarnar at savna inn ruskt, skilja og endurvinna burtur úr innlatnum tilfari, heldur Rúsdrekkasølan, at hesir stovnar áttu at verið snúningsdepilin í einari nýggjari pantskipan.

Rúsdrekkasølan ímyndar sær, at nakrar høvuðsmóttøkur verða kring landið, og at høvuðsmóttøkustøðin verður á Hjalla. 

Skipanin kann verða fíggjað við inntøkum, sum fáast fyri at selja endurnýtslutilfar, panti av íløtum, sum ikki verða borin aftur, og einum umhvørvisgjaldi á íløt, sum ikki kunnu endurnýggjast.