Tað verða framvegis fýra politistar í Vágum

Ætlanin var annars at broyta vaktarskipanina hjá politinum í Føroyum, so bara tveir politistar vóru í Vágum.

Men eftir ein fund við borgarstjórarnar í Vágum, sum hava ampa av rúsevnisnýtslu hjá ungum í oynni, og eftir, at politiið fekk at vita, at skotska flogfelagið Flybe hjá Loganair fer at flúgva til Føroya, krevst manning til Schengen eftirlit, tað er passeftirlit, á flogvøllinum í Vágum.  

Eftir at nógvir politistar síðani í vár eru farnir í farloyvi, eisini barsilsfarloyvi, og onnur eru farin frá fyri aldur, avgjørdi politileiðslan í Føroyum hálvan november at gera nýggja vaktarskipan, sum kemur í gildi 6.februar næsta ár.

Manning í Klaksvík

Í svarinum verður eisini upplýst, at politistøðin í Klaksvík verður mannað alt samdøgrið soleiðis, at um náttina mánadag til hósdag fer ein bilur úr Miðøkinum at koyra í Norðurøkinum.

Hinar næturnar fara fólk í Norðurøkinum framvegis at vera á vakt í Klaksvík. Tey fáa hjálp úr Miðøkinum, tá tað er neyðugt. 

Hetta verður gjørt millum annað fyri at lætta um hjá eldri polistum í Norðurøkinum. Hjá teimum eru náttarvaktir tyngjandi.

FAKTA:

Løgmálaráðharrin spurdi ríkispolitiovastan, sum spurdi politiið í Føroyum, aðrenn hann svaraði. 

Norðurøkið hjá politinum umfatar Norðoyggjar og Eysturoy, í Miðøkinum eru Streymoyggin, Vágar og Sandoy.