Viðgera nú kæruna

Felagið hevur kært Høgna Hoydal, landsstýrismann. Útróðrarmenn vilja hava Landsstýrismálanevndina at kanna embætisførsluna hjá landsstýrismanninum.

Høgni Hoydal gjørdi og legði fram lógaruppskotið um fiskidagarnar í fiskiárinum, sum byrjaði 1. september í fjør. Meginfelagið heldur millum annað uppá, at Høgni Hoydal villleiddi Løgtingið.

Kærdu til Løgtingsins umboðsmann

Við at lata tinginum málið partvís uttan at upplýsa tingið við øllum skjølum, sum eru til taks í málinum, og partvís - at síggja til - uttan at hava viðgjørt heimildargrundarlagið fyri teimum átøkum, sum vórðu skotin upp, villleiddi landsstýrismaðurin tilvitað ella ótilvitað Løgtingið, sigur Meginfelagið. 

Felagið heldur, at tingfólk í roynd og veru viðgjørdu málið og atkvøddu um tað í blindum. Í august í fjør kærdi Meginfelag útróðrarmanna Fiskimálaráðið til Løgtingsins umboðsmann.

Fiskimálaráðið setti til viks grundleggjandi fyrisitingarrætt, sigur Meginfelagið. Fiskimálaráðið er kært fyri ikki at virða tíðarfreistir, upplýsingarskyldu og partshoyring.