Tingarbeiðið byrjar aftur

Fyrsta er frá Sirið Stenberg, landsstýriskvinnu í heilsumálum, um broytingar í løgtingslógini um at umvæla og útbyggja Landssjúkrahúsið fyri 428 milliónir krónir frá 2017-2021.

Í broytingaruppskotinum er talan um at hækka játtanina vegna prísvøkstur, og um at leinga byggitíðina við einum ári. Tað ber eisini í sær 23 milliónir í meirkostnaði.

Málið verður beint í Fíggjarnevndina eftir viðgerðina í morgin.

Allar skúlabøkur gerast til ljóðbøkur

Annað málið á skrá á tingfundinum í morgin er uppskot til samtyktar frá Bjørn Kalsø, sambandstingmanni, um at allar skúlabøkur eisini skulu vera ljóðbøkur. Eftir fyrstu viðgerð í morgin verður málið beint í Mentanarnevndina.
 
Til seinast skulu landsstýrisfólk svara tveimum spurningum. Annar er frá Sonju Jógvansdóttir, sum spyr Henrik Old, um nullhugsjónina í ferðsluni. 

Hin er frá Annitu á Fríðriksmørk, ið spyr Kristinu Háfoss um fíggjarligu støðuna hjá fólki við lág- og miðalinntøkum.