Ferðafólki dámar íslendskan vetur

Síðani fíggjarkreppuna í 2009 er íslendska ferðavinnan ferfalda. Í 2010 komu og fóru 460.000 ferðafólk um flogvøllin í Keflavík, og seks ár seinni er talið komið upp á næstan 1,8 millión ferðafólk.

Sambært íslendska ferðaráðnum er ferðafólkatalið vaksið serliga nógv í vetrarmánaðunum. Meðan vøksturin tilsamans hevur verið um 30-40% um árið, var vøksturin í desember 2016 76,1% í mun til desember 2015.

Bæði november og desember settu met í 2016. Íslendska ferðaflutningsfelagið Isavia væntar, at í 2017 vera tey fleiri, sum ferðast til Íslands um veturin enn tey, sum ferðast um summarið.

Ein tryggari ferðavinna

Vøksturin á vetrarferðafólki er ikki tilvildarligur. Í 2010 fór íslendska ferðaráðið undir eitt átak, sum skuldi tryggja eitt javnari býti av ferðafólki millum árstíðirnar, fyri at arbeiðsplássini í ferðavinnuni skuldi hava eitt tryggari grundarlag.

Tá flugu 2 flogfeløg til Íslands alt árið. Í 2016 er talið av flogfeløgum, sum flúgva til Íslands alt árið, komu upp í 11.

Hóvar ikki øllum

Men, tað eru ikki øll, sum eru líka fegin um ferðafólkavøksturin. Íslendska infrakervið tærist illa av nógvu ferðafólkunum, og kommunurnar hava munandi størri útreiðslur av teimum.

Ísland hevur júst trýfaldað gistingarhússkattin fyri at leggja upp fyri vaksandi útreiðslunum. Í dag er gistingarhússkatturin 25 krónur um náttina fyri hvørt ferðafólk. Roknað verður við, at hetta fer at geva landinum 180 til 190 milliónir um árið í eyka inntøkum.

USA eigur størsta partin av ferðafólki til Íslands. Á øðrum plássi liggur Bretland og á triðja plássi Týskland.

Desember mánaði hevði nógv størsta ferðafólkavøksturin í Íslandi í 2016 (Kelda: Icelandic Tourist Board).