Landsstýrismálanevndin vil hava fleiri upplýsingar

Landsstýrismálanevndini tørvar fleiri upplýsingar fyri at viðgera kærurnar um Høgna Hoydal, landsstýrismann í fiskivinnumálum, og Aksel V. Johannesen, løgmann. 

Nevndin kom tí ikki til nakrar niðurstøður í málunum á nevndarfundi fríggjadagin, sigur Bárður Kass Nielsen, formaður í nevndini. 

Landsstýrismálanevndin viðger í løtuni tvær kærur. 

MÚ kært Høgna Hoydal

Meginfelag útróðrarmanna hevur kært embætisførsluna hjá Høgna Hoydal, tá hann gjørdi og legði fram lógaruppskot um fiskidagar fyri verandi fiskiár. 

Meginfelagið kærir um trý viðurskifti: at brot er framt á grein 22 í lógini um vinnuligan fiskiskap, at eftirkannanin av heimildargrundarlagnum at seta í verk átøkini, er óviðkomandi og ófullfíggjað, og at landsstýrismaðurin hevur villleitt løgtingið. 

Landsstýrismálanevndin hevur nú biðið Meginfelag útróðrarmanna lýsa grein tvey í kæruni gjøllari. Meginfelagið skal greiða nærri frá, hvat meint verður við, tá kært verður um, at eftikannanin av heimildargrundarlagnum er óviðkomandi og ófullfíggjað. 

Meginfelagið hevur fingið tvær vikur at svara spurningunum hjá landsstýrismálanevndini. 

Miðflokkurin kært løgmann

Ta seinnu kæruna eigur Miðflokkurin. Hann vil hava landsstýrismálanevndina at taka støðu til, um løgmaður fór út um sínar heimildir og uttan um løgtingið, tá hann boðaði frá, at stk 14, grein 2  í hjúnabandslógini er yvirtikið málsøki. 

Málið er umfatandi, tí hjúnabandslógin er í løtuni danskt málsøki, men Fólkakirkjan er føroysk, og tað er hana, stk 14, grein 2, snýr seg um. 

Løgmaður hevur sagt seg ikki skilja, hví Miðflokkurin hevur kært seg. Landsstýrismálanevndin hevur nú boðsent øgmanni á fund at greiða frá sínum sjónarmiðum.

Bárður Kass Nielsen, formaður í landsstýrismálanevndini, sigur, at um einar tríggjar vikur hevur landsstýrismálanevndin væntandi tikið støðu til, um nevndin fer viðgera kærurnar, ella hon skal  sleppa málunum.

Landsstýrismálanevndin hevur vegna løgtingið eftirlitsmyndugleika við landsstýrinum.