Samband millum útskiftingina av sjógvi og laksalús

Ein kanning, sum Esbern Patursson, Knud Simonsen og Øystein Paturssin hava almannakunngjørt í altjóða tíðarritinum Aquaculture Environment Interactions, vísir at samband er millum útskiftingina av sjógvi í føroysku firðunum og sjálvsmittuna ella útbreiðsluna av laksalús. 

Útskifting av sjógvi á einum firði er í høvuðsheitum drivin av feskvatni, sum rennur út í fjørðin, muninum millum flóð og fjøru, og av sjóvarfalsrákinum uttan fyri fjarðamunnan, ið dregur sjógvin inni á firðinum við sær.

Út frá tølum fyri hesar tríggjar  drívmegirnar var eitt vísital gjørt fyri flestu alifirðirnar í Føroyum.  Fiskaaling hevur talt lús á føroysku alibrúkunum fyri vinnuna síðani 2009.

Størri útskifting - minni er lúsatrupulleikin

Fyri hvørja einstaka útsetu varð hugt eftur, hvussu vøksturin var í lúsatølunum fram til fyrstu viðgerð ella til tøku, um eingin viðgerð var neyðug. 

Tá ávirkanin av hita var tikin burturúr lúsatølunum, sást greitt samband millum vísutalið fyri útskifting av sjógvi á firðinum og vøksturin í lúsatølunum.  Niðurstøðan er, at størri útskifting, ein fjørður hevur, minni er lúsatrupulleikin. 

Laksalús hevur verið ein plága fyri so at siga alla aling, bæði í Føroyum og í øðrum londum við alivinnu og tíggjutals milliónir, fyri ikki at siga hundratals milliónir eru seinnu árini brúktar at basa lúsatrupulleikanum.