Danir taka undir við lógarbroyting

Uppskotið hevði fyrstu viðgerð í Fólkatinginum týsdagin. Onnur viðgerð verður í apríl. Neyðugt er at broyta rættargangslógina fyri Føroyar.

Tað skal gerast fyri at tryggja, at samkynd, sum eru gift í Føroyum, men flyta í eitt land, har sum samkynt hjúnaband ikki er loyvt, skulu kunna verða skild í Føroyum.

SÍ EISINI Hjúnabandslógin til hoyringar í Føroyum

Um samkynd, sum eru gift í Føroyum, flyta í eitt land, sum ikki góðtekur samkynt hjúnaband, vilja skiljast, ber tað ikki til í landinum, tey búgva í, tí har er samkynt hjúnaband ikki til í nakrari lóggávu um hjúnaskilnað.

Við lógarbroytingini, sum nú er á veg í Føroyum, skulu tey kunna fara aftur til Føroya og fáa Føroya rætt at skilja seg. Løgtingið samtykti broytingina í rættargangslógini 29. apríl í fjør.