Langt eftir á mál við rættargangslógini

Magni Arge, fólkatingsmaður, hevur spurt Søren Pape Poulsen, løgmálaráðharra, um arbeiðið at dagføra føroysku rættargangslógina er byrjað.

Danska Løgmálaráðið hevur lovað at seta arbeiðsbólk at orða dagføringarnar. Nú vil Magni Arge hava at vita, um hetta arbeiðið er byrjað, og nær føroyska rættargangslógin verður dagførd.

Løgmálaráðið ábyrgd fyri dagføringum

Magni Arge sigur í spurninginum til løgmálaráðharran, at hann hevur fingið at vita, at brúk er fyri 200 dagføringum í føroysku lógini, so hon verður sum tann danska.

Tá Fólkatingið týsdagin viðgjørdi eina broyting í føroysku rættargangslógini, minti Magni Arge løgmálaráðharran á, at Løgmálaráðið hevur átikið sær at fáa lógina dagførda.

Søren Pape Poulsen svaraði ikki tá. Nú hevur hann so fingið skrivligan spurning frá Magna Arge.