425 milliónir í vinningsbýti

Á aðalfundinum hjá Bakkafrosti í nýggju hølunum á Glyvrum seinnapartin í dag fer nevndin í felagnum at skjóta upp, at 8 krónur og 70 oyru verða goldin í vinningsbýti fyri hvørt partabrævið.

Hetta gevur 425 milliónir krónur í vinningsbýti av úrslitinum í 2016. Og tað úrslitið var gott. Rakstrarúrslitið hjá Bakkafrosti í fjør var ein milliard og 165 milliónir krónur. Hetta er met hjá fyritøkuni.

Tveir nevndarlimir og nevndarformaðurin standa fyri vali í dag. Valnevndin skjýtur upp at velja øll trý aftur fyri tvey ár, Anniku Frederiksberg og Øystein Sandvik sum nevndarlimir og Rúna M. Hansen sum formann.