Grundlógaravhoyring klokkan 16

Klokkan 16 verður grundlógaravhoyring í málinum um knívsstunguna í Havn í nátt.

Tveir persónar eru tiknir í málinum, men í løtuni er ógreitt, um fleiri eru tikin, og um tey eisini koma fyri rættin nú.

Ákæruvaldið fer væntandi at krevja varðhaldsfongsling, meðan málið verður kannað.

John Martin Olsen, vaktleiðari á løgreglustøðini í Havn, segði við útvarpið fyrr í dag, at løgreglan sóknast eftir vitnum.

Tað var um eitt tíðina í nátt, at løgreglan fekk fráboðan um, at ein maður var illa stungin á vegamótinum Landavegur/Íslandsvegur í Havn.

Tá útvarpið tosaði við vaktleiðaran, visti hann ikki at siga, hvørji vápn eru brúkt.

Stungni maðurin er skurðviðgjørdur á Landssjúkrahúsinum, og støðan hjá honum er stabil.