Arbeiðspláss í oynni tryggjast við lóg

Tað er ein av broytingunum í uppskotinum til eina nýggja alilóg, sum nú er send til hoyringar. Landsstýrismaðurin í vinnumálum hevur í lógaruppskotinum sett inn eina lógargrein, sum beinleiðis knýtir saman aling og virking av laksinum - men barStórara í Suðri.

Lógargreinin er soljóðandi:

"Laksur frá alibrúkum á alifirðum í Suðuroy skal verða virkaður á virkjum í Suðuroy. Við virking skal skiljast bløðging, kryvjing, pakking av heilum rundum fiski, ísaður ella frystur. Landsstýrismaðurin ásetur í kunngerð nærri reglur um virking í Suðuroy."

Stórar íløgur longu gjørdar

Í viðmerkingunum til uppskotið um nýggja alilóg verður víst á, at stórar íløgur eru gjørdar í undirstøðukervið, í vegir, brýr og tunnlar, sum hava gjørt tað lætt at flyta fólk og farm frá einum parti av landinum til annan.

Landið er ein samrunnin eind, millum annað tá tað snýr seg um vinnuligt virksemi, arbeiðsmarknað og útbúgving. Mett verður tí, at tað er ikki tørvur á generelt at taka serlig økisatlit í sambandi við umsiting av alilógini.

Men, sigur lógaruppskotið til nýggja alilóg: "Serligar umstøður gera seg tó galdandi fyri Suðuroynna."

SÍ EISINI Suðuroyggin sertreytir í uppskoti til alilóg

Suðuroyggin er - hóast vælútbygt sjóvegis ferðasamband - í mun til hinar partarnar av landinum fjarskotin, og er í vinnuligum høpi og arbeiðsmarknaðarhøpi enn ikki ein samrunnin partur av hinum økjunum í landinum.

Fólkatalið í Suðuroynni minkar alsamt, hóast tað er vaksandi í landinum sum heild, og arbeiðsloysið er val hægri enn í landinum annars. Tað eru fá faklærd og ófaklærd arbeiðspláss í oynni, og fólkið leitar sær burtur at finna sær arbeiði og kemur ikki aftur.

Tí vil landsstýrið lóggeva, at laksur frá alibrúkum í Suðuroy skal verða virkaður á virkjum í Suðuroy. Sambært heimasíðuni hjá Arbeiðsloysisskipanini eru í dag 63 fólk arbeiðsleys í Suðuroynni.