Vøksturin heldur fram

Talið av ferðafólkaum, sum fara um Vága Floghavn, heldur fram at vaksa. Meira enn 36.000 ferðafólk komu og fóru um Vága Floghavn í juni í ár, samanborið við góð 29.000 ferðafólk í juni í 2016.

Tað eru 24,6 prosent samanborið við juni í fjør. Higartil í ár eru 149.272 ferðafólk komin og farin um flogvøllin, - tað eru gott 18.000 fleiri, enn somu tíð í fjør, skrivar Vága floghavn á heimasíðuni.

Floghavnin roynir at menna umstøðurnar við flogvøllin fyri at fylgja við vøkstrinum í ferðafólkatalinum. Parkeringsøkið verður í løtuni útbygt, og seinni í hesum mánaðinum væntar Vága Floghavn at kunna hýsa 820 bilum á parkeringsøkinum við flogvøllin. 

Tá ið parkeringsøkið er liðugt, skulu lonir byggjast út á parkeringsøkið, soleiðis at fólk í mest møguligan mun kunnu koma til og frá bilinum uttan at gerast vát. Hetta arbeiðið verður væntandi liðugt í novembur í ár, sigur Vága Floghavn.