Bjørt spyr Sirið um mótstøðuførar bakteriur

Kann landstýriskvinnan veita vissu fyri, at tamarhald er á støðuni viðvíkjandi mótstøðuførum bakterinum á sjúkrahúsunum í Føroyum? 

Trupulleikin við fjølmótstøðuførum/multiresistenum bakterium, sum antibiotika ikki rínur við, er komin í tingið.

Bjørt Samuelsen, løgtingskvinna, spyr Sirið Stenberg, landsstýriskvinnu, hvat er gjørt, og ikki minst, hvat verður gjørt við trupulleikan.

Bjørt Samuelsen spurdi eisini í 2015. 

Tá svaraði Karsten Hansen, sum tá var landsstýrismaður í heilsumálum, at avgjørt var alt fyri eitt at gera kanningar.

Harafturat var farið undir at samskipa kunningina til leik og lærd um vandan.

Bjørt Samuelsen vil nú hava at vita, hvat hendir í Føroyum, tí trupulleikin hevur verið kendur í mong ár.

Hon vísir millum annað á Kønberg-frágreiðingina frá 2014 um norðurlendskt heilsusamstarv.

Í frágreiðingini verður víst á, at í framtíðini fara alsamt fleiri at doyggja av ígerðum, sum vit í dag meta at vera vandaleysar.

Hetta fer at leggja stórt trýst á heilsu- og sjúkrahúsverk. 

Felags átak

Fremsta tilmælið tá í 2014 var felags átak móti vaksandi mótstøðuførinum. 

Føroysku heilsumyndugleikarnir vóru við, tá Kønberg-frágreiðingin varð viðgjørd fyri trimum árum síðani.

Heimsheilsustovnurin, WTO, hevur í mong ár rópt varskó og heitt á heimsins stjórnir um at taka trupulleikan í størri álvara.

Bjørt Samuelsen spyr millum annað Sirið Stenberg, hvussu tað ber til, at trupulleikin veksur í Føroyum, hóast tiltøk at fyribyrgja eru sett í verk, sambært landsstýriskvinnuni.

Og hvat verður gjørt beinan vegin, so trupulleikin ikki gerst enn størri. 

Bjørt Samuelsen spyr eisini, um vandin fyri fjølmótstøðuførum bakterium verður tikin við í metingina, tá avgjørt verður, hvørji sjúkrahús í øðrum londum, føroyska heilsuverkið sendir sjúklingar til. 

Hon spyr, hvat er og hvat verður gjørt fyri at kunna almenningin, kommunulæknar og onnur um, hvussu vandan fyri fjølmótstøðuførum bakterium kann avmarkast.