Bingjan og vognurin tikin uppaftur

Enn er ikki liðugt at rudda eftir ferðsluóhappið í Søldarfirði seinnapartin í gjár, tá ein treylari fór oman av vegnum. Bingjan, sum var tóm, og vognurin eru tikin upp aftur. 

Men bilurin liggur framvegis har, sum hann endaði í einum garði niðan fyri vegin. 

Hann verður helst tikin upp í kvøld, tá minni ferðsla er enn um dagin.  

Bar við annan treylara

Treylarin fór út av, tá hann bar við ein annan treylara. Tann bilurin fekk ongan skaða.

Men ein persónbilur, sum eisini var við í ferðsluóhappinum, fekk skaða.

Bilførarin í treylaranum, sum fór útav, varð fluttur á Landssjúkrahúsið.

Politiið veit ikki enn, hvør orsøkin var til óhappið. 

Bilførarin, sum er á sjúkrahúsi, verður avhoyrdur í dag, um læknarnir vilja loyva tí.

Harmonikusamanstoytur

Um áttatíðina í gjárkvøldið var eitt ferðsluóhapp við Gøtugjógv.

Ein bilur steðgaði á vegnum. Bilurin aftan fyri hann kláraði at stegða, men tað gjørdu so tveir bilar aftanfyri hann ikki.

Tríggir bilar fingu skaða í hesum óhappinum. 

Tvey fólk vórðu flutt á sjúkrahús til kanningar fyri pínu í nakkanum.