Altjóða headhuntari leitar eftir stjóra til Betri

Betri søkir nú eftir stjóra til samtakið.

Høvuðsuppgávurnar hjá stjóranum eru at ráðgeva og fyrireika nevndarfundir, leiða og samskipa stápseindirnar, hvørs høvuðsuppgávur eru at veita dótturfeløgunum tænastur í fígging, KT, HR, marknaðarføring og ráðgeving, stendur í lýsingini.

Stjórin skal eisini samskipa virksemið hjá P/f Betri við dótturfeløgini og fyrisita íløgurnar hjá samtakinum.

Við tilvísing til nevndina í P/f Betri fær stjórin ábyrgdina av dagligu leiðsluni og at reka P/f Betri.

Stjórin skal í tøttum samstarvi við leiðslurnar í dótturfeløgunum Betri banka, Betri trygging og Betri pensjón tryggja, at samtakið setur og støðugt hevur røttu framtíðarkósina.

Stjórin fær sostatt leiðsluábyrgd av móðurfelagnum og framtíðar íløgum tess.

Harafturat stendur í lýsingini, at Betri samtakið er í eini menningartilgongd, sum stjórin kemur at mynda og hava høvuðsábyrgdina av.

Eigur nógvar pengar

Ognirnar hjá Betri samtakinum vóru 11,5 mia.kr. við árslok 2016. Eginognin var tá 2,8 mia.kr.

Í Betri samtakinum arbeiða 300 fólk.

Deildin í Danmark hjá altjóða headhuntarafyritøkuni Amrop leitar eftir stjóra til Betri.

Umsóknarfreistin er 22.september.

Sambært lýsingini skal stjórin kunna samskifta á millum annað føroyskum.

Súni fór

Súni Schwartz Jacobsen var stjóri í P/f Betri.

Men hann fór úr Betri samtakinum 13.juli. Hann var eisini stjóri í Betri banka.

Mortan Poulsen er fyribilsstjóri í P/f Betri.

Danin Bjørn Mortensen er fyribilsstjóri í Betri banka.