Stjórin í Klaksvík bilsin av starvslýsingini

-Eg havi ongantíð skilt tað soleiðis, at evsta ábyrgdin fyri alt Sjúkrahúsverkið skuldi vera í Havn. Heldur havi eg skilt tað soleiðis, at leiðarin á Landssjúkrshúsinum skuldi hava ábyrgdina av at loysa teir trupulleikar, sum menningarætlanin vísir á.

Tað sigur Heri Ellingsgaard, stjóri á Klaksvíkar Sjúkrahúsi.

Hann er bilsin av starvslýsingini, har tað stendur, at landssjúkrahússtjórin eisini skal vera forstjóri fyri øll sjúkrahúsini.

Sambært Hera Ellingsgaard er tað avgerandi, at evsta ábyrgdin fyri Klaksvíkar Sjúkrahús liggur í Klaksvík:

- Tað, at evsta ábyrdin hevur verið á staðnum, er eftir mínari meting orsøkin til, at Klaksvíkar Sjúkrahús er tað, tað er. Um evsta ábyrdin ikki var í Klaksvík - men hjá stjóranum í Havn - so rokni eg ikki við, at sjúkrahúsið sá soleiðis út, sum tað ger í dag.