Velja nýggjan formann mikudagin

Mikudagin fer landsstýrismálanevndin at velja nýggjan formann.

Og tað verður annaðhvørt Annita á Fríðriksmørk úr Tjóðveldi ella Magnus Rasmussen úr Sambandsflokkinum, sum verður formaður.

Jógvan Skorheim hevur lagt frá sær sum formaður í landsstýrismálanevndini.

Hann heldur, at nevndin fær ikki arbeitt, tí hon hevur ov fáar heimildir.

Vil hava formansskapin uppí

Jógvan Skorheim vil eisini, at formansskapurin velur nevndina av nýggjum, men tað er ikki bara, sum at siga tað, tí so skulu allar løgtingsnevndirnar veljast av nýggjum, og tað krevur ein meiriluta í Løgtinginum.

Tað er landsstýrismálanevndin sjálv, sum ger av, hvussu hon skipar seg. 

Men Sjálvstýri skipaði seg í valbólk saman við samgonguni, tá nevndarsessirnir vórðu býttir í løgtinginum eftir løgtingsvalið í fyrraárið.

Tað er kortini ikki meira bindandi enn so, at Jógvan Skorheim kann velja Magnus Rasmussen til formann, um hann vil tað.