Landsstýrið vil sleppa undan kærum og tulking

Landsstýrið vil sleppa undan kærunum frá fólki, sum arbeiðir í dagstovnum og í dagrøkt hjá kommununum.

Tað vil eisini beina av vegnum eina tulkingaróvissu.  

Tí skal lógin broytast.

Við galdandi lóg í hondini hevur Løgtingsins umboðsmaður tríggjar ferðir staðfest, at fólk í dagstovnum og dagrøkt kunnu kæra setanarmál og onnur starvsfólkamál til landsstýrisfólkið í mentamálum.

Hesin rættur skal strikast sambært lógarbroyting, sum er á veg í løgtingið.

Fólkini fara tó í framtíðini framvegis at kunna senda slíkar kærur til Løgtingsins umboðsmann, Fasta gerðarrætt og dómsvaldið.

Tríggjar staðfestingar

Løgtingsins umboðsmaður hevur í trimum uppsagnarmálum, einum í Viðareiði í 2005, einum á Tvøroyri í 2008 og einum í Havn í 2010, staðfest, at til ber at kæra setanar- og starvsfólkamál til landsstýrisfólkið.

Onnur fólk, sum arbeiða hjá kommunum, hava ikki sama rætt at kæra sum tey, sum arbeiða í dagstovnum og dagrøkt.

Mentamálaráðið sigur, at við lógarbroytingini verður ein tulkingaróvissa millum Mentamálaráðið og Løgtingsins umboðsmann øðrumegin og Føroya kommunufelag og ávísar kommunur hinumegin beind av vegnum.