Úr at gera á skaðastovuni

Tey hava havt nógv at gera á skaðastovuni á Landssjúkrahúsinum í nátt.

Tað er tó ikki fýrverk, men hálka, sum hevur gjørt, at fleiri fólk máttu leita sær hjálp á skaðastovuni.

- Tað eru nógv fólk, sum eru gliðin í hálkuni, og tí hava vit havt fleiri brot í fótliðum, albogum og akslum, sigur Heini Harryson, lækni.

Sambært honum hava tey ikki sæð stórvegis til skaðar, ið kunnu standast av fýrverki. Tó so, so var ein persónur óheppin og fekk eina rakett í høvdi. Støðan var á ongan hátt lívshættislig, og viðkomandi hevði eina brotna tonn og sár á varrunum, sum síðani bleiv seymað.

Á skaðastovunum í Klaksvík og Suðuroy hava tey ikki sæð nakað til stórar skaðar av fýrverki.